Қатралар

ТУШ

Тушларимга ишонаман! Улар бахтли кунларимдан нишона берадилар. Яшил кенгликларнинг эрка қизи эканлигим рост.

Мен тушлар бағрида зангори осмонда учаман, орзуларимнинг гул тўла қучоғида сезаман ўзимни. Бахтлиман-ку, ўнгим тушдан гўзал. Тушларим яхши кунларимнинг элчиси, даракчиси.

ТАБИАТ СЕҲРИ

Баҳор баҳорлигини исботлади. Оқ ёмғир ёғди. Бирам ажойиб, бирам хушҳаво. Булутлар орасидан янги келинчак мисоли қуёш мўралаб-мўралаб қўяди. Ҳамманинг қалбида кўклам нашидаси, севинчи...

Мана шундай гўзаллигини ҳамиша сақласа-да бу кўҳна дунё...

ҲАЙРАТ

Ёмғирдан ҳосил бўлган кўлмак сувда ола ҳакка чўмилаябди. Худди инсондай, ўзини сувда шўнғитиб-шўнғитиб олаябди. Қора тумшуқларини, кулранг қанотлари-ю, сариқ тирноқли оёқларини сувда тозалади. Қуруқроқ ерга ўтиб, сувни атрофга силкитиб, қоқиб юборди-да, учиб кетди.

Эҳ-а, ҳатто ола ҳакка ҳам ўзига оро бераркан, ювилиб-таранаркан...

КАПАЛАК

Қанотлари ранг-баранг капалак гулдан гулга қўнади. Ҳозир гўё ундан бахтлиси йўқдек: соғинганда кўришган дўсти висолидан маст. Кимдир капалакнинг енгилтабиатлигини, кўчиб-кўчиб юрганлигини қоралайди. Йўқ, менимча, у бу таърифга лойиқ иш қилмаябди. У барчани баровар севиб, ардоқлаб, гўзалликни қадрлай олган ижодкор...

Шаҳло АБДУСАИДОВА