ИСТЕЪДОДГА ЭЪТИБОР

Мамлакатимизда истеъдодли ва иқтидорли йигит-қизларга алоҳида эътибор қаратилиши  кўнгилларни осмон қадар юксалтирмоқда. Шу ўринда умид билан қўлига қалам тутган адабиёт ихлосмандлари, ёш қаламкашлар ҳам  ўзларига илҳом бераётган мавзуларда қалам тебратиб, эл назарига тушмоқда.

Боёвут енгилсаноат ва агросервис касб-ҳунар коллежида кўплаб истеъдодли ўқувчилар таҳсил олади. Ана шулардан бири, Зулфия номидаги Давлат мукофоти  номзоди, ёш қаламкаш Одина Абдимўминовадир. Одинанинг шеърлари  "Давр ёшлари" газетасида тез-тез чоп этилади. Ўтган йили нашрдан чиққан  "Сирдарё  ғунчалари" номли ёшлар баёзида ҳам унинг туркум шеърлари ўрин олган. Ижод машаққатини тушуниб ўз билим ва кўникмаларини янада мустаҳкамлашга интилиб келаётган ижодкор қизнинг илк шеърий тўплами ҳам тенгдошлари қўлига етиб борди.  Шу йил Одина Абдимўминованинг "Онажоним орзуси" номли илк  шеърий китобчаси Тошкентдаги "Muharrir" нашриётида чоп этилди.

Коллежнинг мажлислар залида бўлиб ўтган  ана шу китоб тақдимотига бағишланган тадбир тенгдошларида катта таассурот қолдирди. Китобчадан ўрин олган она-Ватан, тинчлик, ёшлик, бахтиёрлик, муҳаббат, қишлоқ табиати, самимий одамлари  мавзуидаги шеърлар барчага манзур бўлди. Ёш ижодкорнинг шеърлари ҳақида  устозлардан Норинисо Қосимова, шоир Ҳусниддин Ҳайитов ўз фикр-мулоҳазаларини билдиришди. Улар  ёш ижодкорнинг ютуқ ва камчиликлари, олдида турган вазифалар, интилишлар ҳақида алоҳида тўхталиб, кейинги ижодида муваффақият тилашди.

Тадбирда коллеж директори Зафар Комилов, коллеж  ахборот ресурс маркази раҳбари Санобар Исроиловалар ҳам ўз фикрларини билдиришди.

Тақдимот иштирокчиларда бадиий адабиётга меҳр ва қизиқиш уйғотибгина қолмасдан, янги ижодкорларнинг, истеъдод соҳибларининг кашф этилишига туртки бўлди, десак хато қилмаймиз.

Шаҳло АБДУСАИДОВА