ГАП ИЖРОДА ҚОЛМОҚДА

Ёшларни тадбиркорлик фаолиятига кенг жалб қилиш ва уларнинг ғояларини қўллаб-қувватлаш мақсадида “Ёшлар — келажагимиз” жамғармаси фаолият юритмоқда. Ўтган йилнинг ўзида жамғарма томонидан 175 нафар йигит-қизларнинг бизнес режаларини амалга ошириш учун имтиёзли кредит маблағлари ажратилганди. Белгиланган банклар томонидан кредит маблағлари ўз вақтида ажратилишида айрим муаммоларни ҳал этиш мақсадида Гулистон давлат университетининг катта мажислар залида танқидий руҳда йиғилиш бўлиб ўтди. Йиғилишда Ўзбекистон ёшлар иттифоқи Марказий Кенгаши раисининг биринчи ўринбосари, “Ёшлар — келажагимиз” жамғармаси ижрочи директори Б.Баҳромбеков, ёшлар масалалари бўйича бошқарув раиси У.Валиев, Ўзбекистон Республикаси ТИФ “Миллий банк” кредит департаменти бошқарма бошлиғи Б.Зияев, АТ “Халқ банки” бошқаруви риск департаменти директор ўринбосари Х.Очилов, вилоят прокуратураси, Ўзбекистон ёшлар иттифоқи вилоят Кенгаши ҳамда маҳаллий Кенгаш раислари, ходимлари ҳамда ёшлар иштирок этишди.

— Ўтган йилги манзилли режага асосан яна 85 нафар ёшларга “Миллий банк”, “Ҳамкор банк” ва “Халқ банки” томонидан жами 7 миллиард 320 миллон сўм миқдорида кредит ажратилиши керак эди, - дейди “Ёшлар — келажагимиз” жамғармаси Гулистон шаҳар филиали раҳбари, вилоят координатори Зафар Тулқинов. —  Аммо банклар томонидан белгиланган кредитлар айрим сабабларга кўрга ўз вақтида чиқарилмаган. Мазкур йилда ўтган йилда мурожжат қилганлар талабини қондириш масаласига ойдинлик киритилди ва ижобий томонга ҳал этиладиган бўлди. Ҳозирги кунгача 85 нафар ёшлардан ташқари 8 нафарига жамғарма томонидан кредит ажратилди.