ХОСИЯТСИЗ ХОНАДОН

Биз кўп қаватли уйда яшаймиз. Ҳар хил одамлар, қўни-қўшнилар ҳам турли туман. Аммо кирди-чиқди қиладиганларимиз саноқлигина. Ёнмиздаги подъездда аввал телбасифат кампир чоли билан яшарди. Шу кампирдан роса чўчирдик.

Болаларни кўрса бақиргани-бақирган. Айтишларича, ўзининг фарзанди бўлмагани учун  болаларни ёмон кўрар экан. Чолининг эса катта-катта ўғил-қизлари келиб кетиб туришарди. Аёл шу болаларни ёшлигидан отасиз қолишига сабабчи бўлганмиш. Чоли қишлоқдаги етти боласин ташлаб унга уйланиб олган экан. Бечора хотини қишлоқдаги катта ҳовли-жойларни-ю шунча  фарзандни ёлғиз ўзи эплаганмиш. Ўша маҳалдаёқ  уларни билган кексалар ҳали шу болаларни уволи уради, бу сотувчини дейишаркан. Мана орадан йиллар ўтиб уни мияси суйилиб қолган, эси кирди-чиқди эди. Куни бўйи  бақириб чақиради. Чол баъзида бозорга соатлаб кетиб қолади. Уйни ичида қулфланиб  қолган кампир деразадан  ўтган-кетганга ялинаверади, чолини қарғайверади.

Умр елдек  ўтиши рост эканми, кампирни эплаёлмаган чолга болаларининг раҳми келиб уларни қишлоққа олиб кетишди. Бир маҳаллари бахтини ва болаларини ота меҳрини тортиб олган аёлни кундоши уйига олиб кирибди. Бирон йилча яшаб тентак кампир оламдан ўтгач, чол болаалри ва биринчи кампири билан қолди. Шаҳардаги уйни сотишди. Минг афсуски бу хонадонга ким келса касал бўлади ёки турмуши бузилади денг. Аввал бу ерда ким яшаганини билганлар бу жойга қарғиш теккан деб юқоридаги воқеани эсалашади. Яқиндаям бир оила кўчиб келди-ю сал ўтмай эри аварияга учради. Аввалроқ яшаганлар ажралиб кетишди. Яна аввалгилари бефарзандлиги учун уйи бузилганди. Дунёнинг иши қизиқ, ёмон одамнинг ёмонлиги ҳатто деворларгаям, биноларгаям ўтиб қолармикан ё?...

Шаҳло АБДУСАИДОВА